Samarbeid i klassen

Du kan samarbeide med medstudentane i klassen din på ulike måtar. Du kan vera aktiv både i nettundervisning og campusaktivitetane, og dele tankar, idear og meiningar ved å ta ordet eller ved å skriva i chattefeltet. Etter ei samling med din studentgruppe kan de for eksempel fortsette meiningsutvekslingane i Canvas. Faglærarane kan opprette diskusjonstrådar innanfor utalte tema, men du kan og starta diskusjonar sjølv.

Samarbeid i studiegruppa

Dei fleste av våre studentar vert delt inn i grupper. I gruppa kan de repetera pensum, diskutere faglege problemstillingar og samarbeide om oppgåver.

I løpet av studiet kan gruppa verta beden om å levera felles svar på arbeidskrav. Det er faglærar som avgjer kva for format svaret må ha for å verta godkjent. Faglærar kan til dømes be om å få svaret levert som video, lydfil eller tekstfil. Ofte vil faglærar krevje at gruppa skal levere eit skriftleg svar. Då anbefaler me at de skriv teksten i eit samskrivingsdokument i Office 365. Her kan alle gruppemedlemmene redigera i same dokument samstundes. Som student ved Høgskulen på Vestlandet kan du laste ned, installere og bruke Office 365 kostnadsfritt.