Du kan også laste ned denne rettleiinga som PDF.

1. Sjekk om emnet ditt er gjort klart for slik overføring

Du vil sjå «Overfør til FS» ein eller annan stad i menyen i emnet:

Menyvalet "Overfør til FS"

Dersom du ikkje ser denne, må du leite under «Innstillingar → Navigasjon», les meir om dette her.

2. Sett opp læringsaktivitetane i Canvas

Du kan når som helst i semesteret setje opp dei aktuelle læringsaktivitetane i Canvas. Sjå utfyllande informasjon om kven du skal kontakte for å gjere endringar nedst.

Læringsaktiviteten må vere registrert i FS. Dette kan du sjekke i Fagpersonweb.
Namnet på læringsaktiviteten må vere så likt det som er registrert i FS at du ikkje kan forveksle dei (sjå punkt 3 a i overføringsprosessen).
Læringsaktiviteten må ha «Godkjend/Ikkje godkjend» som vurderingsform.

3. Overføringsprosessen

Når du vel «Overfør til FS» må du trykke på «Autoriser»-knappen:

Du må trykke "Autoriser"-knappen

Etter det står det «Du sendes videre …» på skjermen ei lita stund. Dersom du er registrert for å kunne overføre kjem det eit spørsmål om du har avklart dette med studieadministrasjonen. I dei fleste tilfelle er det heilt greitt å velje "Fortsett til appen", men er du i tvil kan du kontakte eksamen@hvl.no. Dersom du ikkje er registrert for å kunne overføre får du meldinga "Feil: Din bruker er ikke lagt til dette kurset. Du har dermed ikke tilgang til å gå videre." Ta i så fall kontakt med emneansvarleg i emnet.

3 a) Vel rett læringsaktivitet som skal bli overført

No får du opp to lister med læringsaktivitetar. Lista til venstre viser dei som er registrert i Canvas, lista til høgre dei som er registrert i FS. Dersom du ikkje ser læringsaktiviteten i Canvas må du sjekke at det er oppretta. Dersom du ikkje ser læringsaktiviteten i Fagpersonweb tar du kontakt med eksamen@hvl.no.

Klikk på ein læringsaktivitet i Canvas, og den tilsvarande i FS (som du ser treng dei ikkje ha identiske namn, men det må ikkje vere tvil om kven du skal velje):

Vel rett aktivitet i Canvas og i FS

NB! Det er her svært viktig at læringsaktiviteten i Canvas har same namn som i FS/Fagpersonweb. Eller i det minste må namna vere slik at det ikkje er råd å forveksle med andre læringsaktivitetar. Som biletet viser er det ein risiko for å bli usikker når namna ikkje stemmer heilt.

3 b) Overfør resultata

Når du har valt rett kombinasjon av læringsaktivitet både i Canvas og FS vil skjermbiletet endre seg:

Du har vald to aktivitetar; ein i Canvas og ein i FS

Du får grøn skugge bak dei to du har vald
Du får (i Canvas-læringsaktiviteten) opp ei liste over alle registrerte studentar, med avmerking om dei har godkjend eller ikkje og om dei er overført eller ikkje. Peik på eitt av symbola for å få opp ein liten hjelpetekst.
Du får høve til å overføre berre dei godkjende, eller alle resultat (sjå også punkt 3 c nedanfor).

Uansett om du vel den blå eller lilla knappen får du eitt spørsmål til:

Vel mellom "Test" eller "Endeleg" overføring

Det kan vere lurt å bruke «Test overføring …» først, for å gå gjennom eventuelle feilmeldingar. Dersom alt går bra får du ei kvittering på det (Vellykket: Ingen feil oppdaget»):

Kvittering for vellukka overføring

3 c) Overføre i puljar

Dersom du ikkje er ferdig med å vurdere alle arbeidskrava kan du likevel overføre dei du har vurdert (anten «Godkjend» eller «Ikkje godkjend»). Så kan du kome tilbake til punkt 3 a) og 3 b) og overføre fleire etter kvart som du er ferdig med dei. Du vil då få ei feilmelding på dei som alt er overført:

Rar feilmelding dersom du har overført vurdering frå før.

men den kan du ignorere.

Dersom noko er uklart ta kontakt med canvas@hvl.no

4. Kva med dei som har godkjent frå før?

Ein del studentar tar emne opp att, og ligg registrert som aktive studentar i Canvas. Men dei ha kanskje godkjent læringsaktivtetar frå før, og treng ikkje levere noko dette semesteret. Det kan du ikkje sjå i Canvas, og du kan då fort registrere dei som «ikkje godkjent». Men dette gjer ingen ting; så lenge dei ligg registrert i FS som godkjent så vil ikkje du kunne ta vekk denne godkjenninga.

Dersom du vil sjekke kven av studentane som har godkjent frå før må du gå inn i Fagpersonweb for å finne dette.

NB! For å kunne bruke denne funksjonen i Canvas må følgjande vere oppfylt:

Den faglæraren som skal registrere læringsaktivitetane må vere registrert i emnet i FS, ikkje berre i Canvas. Dersom du har tilgang til emnet i Fagpersonweb er dette i orden. Dersom du ikkje finn emnet der, send melding til FShjelp@hvl.no for å bli registrert som emneansvarleg eller faglærar.
Det er berre studentar som er registrert med vurdering i FS som kan bli overført på denne måten; studentar som er lagt til direkte i Canvas vert ikkje med.
Alle læringsaktivitetane må ha «Godkjent/Ikkje godkjent» som vurdering; læringsaktivitetar med poengsum eller bokstavkarakter som vurdering må du framleis registrere i Fagpersonweb.
Læringsaktivitetar på forma «fire av fem må vere godkjent» kan du registrere ved å lage ei kunstig «oppsamlingslæringsaktivitet» i Canvas, og så overføre denne eine læringsaktiviteten til FS. Alternativt kan du registrere dette i Fagpersonweb.
Læringsaktivitetar som ikkje vert registrert i Canvas (til dømes obligatorisk frammøte) må du registrere i Fagpersonweb.
Alle læringaktivitetane må vere registrert i FS, helst med same namn og i det minste med namn som gjer at det ikkje er råd å forveksle (sjå punkt 3 a i overføringsprosessen). Du kan sjå i Fagpersonweb korleis læringsaktivitetane er registrert i FS. Dette er basert på informasjonen som står i emneplanen. Dersom læringsaktiviteten i Fagpersonweb ikkje stemmer med emneplanen tar du kontakt med eksamen@hvl.no